Մեղրիում առանց ազատ տնտեսական գոտու էլ մշտապես նախատեսվում և իրականացվում է քաղաքի ենթակառուցվածքների թարմացում՝ նկատի ունենալով հարևան Իրանից զբոսաշրջիկների և տնտեսվարողների մշտական և ավելացող այցելությունները, ինչպես նաև հաշվարկները, որ այդ աճն ավելանալու է 2018 թ. հունվարի մեկից: Եվ այս առումով, ամենակարևորը զուգարանների հարցն է, որ իրանական կողմը մշտապես բարձրացնում է հայաստանյան պաշտոնյաների հետ հանդիպումների ժամանակ: Այս մասին Tert.am –ին հայտնեց Մեղրու քաղաքապետ Մխիթար Զաքարյանը՝մանրամասնելով. «Իրենց զուգարանները այլ կերպ են և իրենք շատ դժվարությամբ են օգտվում: Եվ հանդիպումների ժամանակ իրենք միշտ այդ հարցը բարձրացնում են, միայն Մեղրիի մասով չէ, ընդհանրապես: Որ, եթե ուզում եք մեր զբոսաշրջիկների համար բարենպաստ պայմաններ լինեն, ապա այդ տարրական հարցը լուծեք: Ինձ որ ամեն հանդիպման ասում են: Հիմա մենք 2018-ին նախատեսել ենք, նախագծման փուլում է»,-ասաց քաղաքապետը:
Իրան-Հայաստան մաքսակետում արդեն իսկ նման զուգարաններ կառուցված են, սակայն մյուսները նախատեսված է իրանցիների համար տրանզիտ հանդիսացող Մեղրուց դուրս եկող երկու ՝ դեպի Կապան ու Երևան շարժվող ճանապարհների համար:
Հիշեցնենք, որ երեկ Սյունիքում տրվեց Մեղրիի ազատ տնտեսական գոտու պաշտոնական մեկնարկը, և ինչպես հայտարարեց վարչապետ Կարեն Կարապետյանը, որ այս գոտին լավ վայր է Հայաստանի՝ ԵԱՏՄ-ի, ԵՄ-ի , հարևան Իրանի ունեցած տնտեսական հնարավորություններն ու ռեժիմները մեր երկրում բիզնեսի զարգացմանը ծառայեցնելու համար: Հիշեցնենք նաև , որ ՄՏԳ-ն նախատեսված է կառուցապատել 2 փուլով և այս գործունեությունը կազմակերպելու համար առաջիկա տարիներին նախատեսվում է ներգրավվել 100-130 միլիոն դոլարի ներդրումեր և 50-70 շահագործող ընկերություններ, որոնք հարևան Իրան պետք է արտահանեն 250 միլիոն դոլարի ապրանքներ:
Մեղրու քաղաքապետն այս առնչությամբ անկեղծորեն խոստովանեց, որ, քանի որ պաշտոնական մեկնարկը տրվել է, շատ մեծ ու հավակնոտ ծրագրեր չունեն, և գոտու գործելուն հընթացս կճշտվեն ենթակառուցվածքների առումով նոր առաջնահերթությունները:
Մխիթար Զաքարյանի տեղեկացմամբ՝ քաղաքում էլ ավելի է աճելու բնակարանների վարձակալությունը, և քաղաքում, նրա խոսքով, առանց ազատ գոտու էլ բնակարանների գները համարյա հասնում են մայրաքաղաքին: Կոնկրետ Ագարակում (որը խոշորացման արդյունքում հիմա Մեղրի վարչական շրջանում է)բնակարանների գները թե՛ վարձի, թե՛ վաճառքի առումով գրեթե նույնն են, ինչ Երևանի Հարավ–արևմտյան թաղամասում:
«Մի քիչ էդ առումով բարենպաստ վիճակում ենք, բնակչությունը, ցավոք քիչ է, բայց չկա արտագաղթ և կա աշխատատեղերի առկայություն: Պղնձամոլիբդենային կոմբինատ ունենք, 2՝ հայկական և ռուսական զորամասեր կան: Մաքսակետն իր՝ ենթակառուցվածքներով: Ազատ գոտու հեռանկարը»,-թվարկեց Մեղրու քաղաքապետը:
Նա սպասում է ազատ գոտու համար ծրագրեր ունեցող ներդրողներին, քանի որ ասում է՝ շատերն են հետաքրքրված՝ թե՛ իրանական, թե՛ հայկական կողմից: Հիշեցնենք, որ երեկ արդեն 3 ներդրող իրանական ու հայկական կողմերի հետ արդեն ստորագրել են ազատ տնտեսական գոտում համագործակցության հուշագիր:
Մեղրու քաղաքապետը նշեց, որ 2018-ի հունվարի 1-ից փոխադարձաբար վերանալու են նաև Հայաստանի ու Իրանի մարդատար մեքենաների մուտքի վճարները: Եվ սրա համար իրանական մաքսակետում արդեն իսկ կառուցվել է մեքենաների կայանատեղի և իրանական սովորույթներով՝ սանհանգույցներ: