| Բովանդակություն * | Հունիսի 18-ին Մեղրի համայնքի ղեկավար Խաչատուր Անդրեասյանն ընդունել է ՄԱԿ-ի Փախստականների հարցերով Գերագույն հանձնակատարի (UNHCR) Գորիսի գրասենյակի ղեկավար Սահականուշ Եղիազարյանին, Յունիսեֆի ներկայացուցիչ Դիմիտրի Բեցկովին։ Ողջունելով հյուրերին ՝ համայնքի ղեկավարը շնորհակալություն է հայտնել Մեղրի համայնքի և շրջակա սահմանամերձ բնակավայրերի նկատմամբ ցուցաբերվող շարունակական ուշադրության և գործնական աջակցության համար։ Նա ընդգծել է, որ ՄԱԿ-ի մասնագիտացված գործակալությունների աջակցությամբ իրականացվող ծրագրերը զգալի ներդրում ունեն տեղահանված անձանց սոցիալական պաշտպանվածության, համայնքային ինտեգրման և ընդհանուր բարեկեցության ապահովման գործում։ Սահականուշ Եղիազարյանը ներկայացրել է ՄԱԿ-ի ՓԳՀ գործունեության առաջնահերթությունները տարածաշրջանում՝ շեշտադրելով պաշտպանական մեխանիզմների ուժեղացումը, շահառուների կարիքներին արձագանքող նախաձեռնությունները և տեղական ինքնակառավարման մարմինների հետ գործընկերային համագործակցության ընդլայնումը։ Խաչատուր Անդրեասյանն, իր հերթին, ներկայացրել է համայնքի սոցիալ-տնտեսական իրավիճակը, առավել կարևոր լուծման կարիք ունեցող խնդիրները, ինչպես նաև ընդգծել ապագա համատեղ ծրագրերի անհրաժեշտությունը՝ ուղղված տեղական կարողությունների զարգացմանը և համայնքի դիմակայունության ամրապնդմանը։ Հանդիպման ավարտին կողմերը վերահաստատել են փոխադարձ պատրաստակամությունը՝ շարունակելու կառուցողական երկխոսությունը և ընդլայնել համագործակցությունը՝ ի շահ Մեղրի համայնքի բոլոր բնակիչների։ |