Հուլիսի 7-ին Մեղրի համայնքի ղեկավար Խաչատուր Անդրեասյանն ընդունել է Մեղրի քաղաքի Զորավար Անդրանիկի փողոցի 28 շենքի բնակիչներին, ովքեր ներկայացրեցին մի շարք խնդիրներ՝ շուրջ 70 տարվա պատմություն ունեցող շենքի տանիքը գտնվում է ծայրահեղ անմխիթար վիճակում՝ տեղումների ժամանակ ջուրը կաթում է բնակարաններ, առաջացրել է խոնավություն, ինչը բացասաբար է ազդում պատերի, առաստաղների և բնակարանային պայմանների վրա։ Շենքի բակը չի համապատասխանում ոչ անվտանգության, ոչ էլ բնակելի տարածքի պահանջներին։ Բակով մեքենաները բարձր արագությամբ են անցնում, ինչը վտանգ է ներկայացնում հատկապես երեխաների համար։ Հարակից տարածքում երեխաների համար չկա խաղահրապարակ։
Համայնքի ղեկավար Խաչատուր Անդրեասյանը լսեց մտահոգությունները և վստահեցրեց, որ սրտացավ մոտեցում ունի նման հարցերի նկատմամբ։ Նրա խոսքով՝ հնարավորության սահմաններում կիրականացվի ամեն ինչ՝ շենքի տանիքի և բակի խնդիրը լուծելու համար։
Բնակիչները իրենց հերթին հույս հայտնեցին, որ համայնքի ղեկավարի այս արձագանքը կդառնա իրական քայլ դեպի փոփոխություն, և վերջապես տարիներ շարունակ կուտակված խնդիրները կստանան լուծում։ |