Օգոստոսի 6-ին Մեղրի համայնքի ղեկավար Խաչատուր Անդրեասյանն աշխատանքային այցով Թխկուտ բնակավայրում էր։ Այցի ընթացքում համայնքի ղեկավարը հանդիպել է բնակիչների հետ, լսել նրանց բարձրաձայնած խնդիրները և ներկայացրել դրանց լուծման հնարավոր ուղիները։ Հանդիպման հիմնական թեման խմելու ջրի ապահովման հարցն էր։ Խաչատուր Անդրեասյանը տեղեկացրեց, որ այդ ուղղությամբ բանակցություններ է վարել «Վեոլիա ջուր» ընկերության տնօրինության հետ՝ խնդիրն արդյունավետ լուծելու նպատակով։ Համայնքի ղեկավարի հրավերով հանդիպմանը ներկա էր նաև «Վեոլիա ջուր» ընկերության ներկայացուցիչ Էմիլ Ադամյանը։ Բնակիչների հետ քննարկվել է նաև խաղահրապարակի կառուցման հարցը։ Համայնքի ղեկավարը նշել է, որ ծրագրի իրականացման համար անհրաժեշտ է նաև բնակիչների ակտիվ ներգրավվածությունը համատեղ աշխատանքներին։
Խաչատուր Անդրեասյանի խոսքով՝ համայնքապետարանի առաջնահերթություններից է բնակավայրերում սոցիալական և համայնքային ենթակառուցվածքների բարելավումը, իսկ նման հանդիպումները թույլ են տալիս ավելի արագ արձագանքել բնակիչների կարիքներին։ |