Հանդիպումն անցկացվեց աշխատանքային ձևաչափով՝ նպատակ ունենալով քննարկել ծրագրի ընթացիկ փուլում իրականացվող աշխատանքները, համայնքի ներգրավվածության մակարդակը և առկա հիմնախնդիրները։ Ընթանում են ծրագրով նախատեսված 32 կմ երկարությամբ ճանապարհի կառուցման աշխատանքները, մասնավորապես՝ հողային աշխատանքներ, թունելների փորման գործընթաց, Մեղրի քաղաքի տրանսպորտային հանգույցի կառուցում, հենապատերի և կամուրջների հենարանների բետոնացում։ Նախատեսվում է կառուցել երկու թունել՝ 360 մ և 520 մ երկարությամբ, ինչպես նաև 17 կամուրջ, որոնցից մեկը՝ 720 մետր երկարությամբ։ Համայնքի ղեկավար Խաչատուր Անդրեասյանը կարևորեց ծրագրի դերը ոչ միայն տարածաշրջանի ճանապարհատրանսպորտային ենթակառուցվածքների բարելավման, այլև սոցիալ-տնտեսական զարգացման տեսանկյունից՝ ընդգծելով բնակչության շահերի պահպանման և բնական միջավայրի նկատմամբ պատասխանատու մոտեցման կարևորությունը։ Ծրագիրն իրականացվում է Կայունացման և զարգացման Եվրասիական հիմնադրամի և ՀՀ կառավարության ֆինանսավորմամբ։ Կողմերը պայմանավորվեցին շարունակել համագործակցությունը՝ ապահովելով ծրագրի պատշաճ և արդյունավետ ընթացքը։