Օգոստոսի 27-ին Մեղրիի համայնքապետարանում հյուրընկալվեցին երկու կարևոր ծրագրերի պատվիրակություններ՝ «Սյունիքի վերականգնման, դիմակայունության և զարգացման ծրագրի» (R2D Սյունիք) և ՄԱԿ-ի Պարենի համաշխարհային ծրագրի (UN WFP) ներկայացուցիչները։

Հանդիպմանը մասնակցեցին համայնքապետարանի աշխատակազմի համապատասխան մասնագետները և համայնքի ղեկավար Խաչատուր Անդրեասյանը։ Քննարկվեցին արդեն կատարված աշխատանքները, ընթացքի մեջ գտնվող նախաձեռնությունները և առաջիկա ծրագրերը։

Քննարկումների առանցքում էին համայնքի ենթակառուցվածքների բարելավումը, սոցիալ-տնտեսական զարգացման ծրագրերը և բնակիչների կենսապայմանների կայուն ապահովումը։

Համայնքի ղեկավարը ընդգծեց, որ Մեղրին պատրաստ է շարունակել ակտիվ համագործակցությունը երկու գործընկեր կառույցների հետ՝ միավորելով տեղական ջանքերն ու միջազգային աջակցությունը։

R2D Սյունիք ծրագրի և ՄԱԿ-ի Պարենի համաշխարհային ծրագրի ներկայացուցիչները բարձր գնահատեցին Մեղրիի համայնքի պատրաստակամությունն ու ընդգծեցին, որ համատեղ աշխատանքը նպաստելու է Սյունիքի մարզի կայուն զարգացմանը և բնակչության բարեկեցության բարձրացմանը։

Քննարկման ավարտին կողմերը պայմանավորվեցին պահպանել մշտական կապ և պարբերաբար ամփոփել ծրագրերի ընթացքը՝ ապահովելով թափանցիկություն և արդյունավետություն։