| Բովանդակություն * | Հունիսի 19-ին Մեղրի համայնքի ղեկավար Խաչատուր Անդրեասյանն ընդունել է Հայաստանում Չինաստանի Ժողովրդական Հանրապետության դեսպանատան կցորդ Ճան Ցիմինին։ Խաչատուր Անդրեասյանն ողջունել է հյուրերին և կարևորել Հայաստանի և Չինաստանի միջև ձևավորված բարի կամքի ու փոխշահավետ համագործակցության մթնոլորտը՝ ընդգծելով Մեղրիի դերակատարությունը որպես հարավային դարպաս և լոգիստիկ ուղղություն։ Հանդիպման ընթացքում առանցքային թեմա են կազմել տարածաշրջանային անվտանգության հարցերը, մասնավորապես՝ Չինաստանի քաղաքացիների տեղաշարժի, ժամանակավոր տեղակայման և ապահովության կազմակերպման մարտահրավերները՝ կապված Մեղրիի և հարակից տարածքների նկատմամբ աճող հետաքրքրության հետ։ Մեղրի համայնքի ղեկավար Խաչատուր Անդրեասյանը վերահաստատել է համայնքի պատրաստակամությունը աջակցել Հայաստանում Չինաստանի դեսպանատան աշխատանքներին՝ որպես հուսալի գործընկեր՝ ցանկացած համագործակցության դեպքում։ Կողմերը պայմանավորվել են բոլոր քննարկված հարցերի շուրջ շարունակել սերտ կապը, անհրաժեշտության դեպքում ապահովելով օպերատիվ արձագանքման և փոխօգնության գործնական մեխանիզմներ։ |