| Բովանդակություն * | Այսօր՝ հուլիսի 15-ին, Մեղրի համայնքի ղեկավար Խաչատուր Անդրեասյանն հյուրընկալեց Հայաստանի Հանրապետության Կենտրոնական բանկի պատվիրակությանը, որի հետ քննարկվեցին հոկտեմբեր ամսին Մեղրի համայնքում նախատեսվող «Հայաստանի դրամաշրջանառության պատմություն» խորագրով բաց տեղեկատվական հանդիպման կազմակերպման ուղղությամբ համագործակցության մանրամասները։ Հանդիպման ընթացքում կողմերը մանրամասն անդրադարձան նախատեսվող միջոցառման կառուցվածքին, կազմակերպչական ձևաչափին, ինչպես նաև համայնքի ներգրավվածության հնարավորություններին։ Քննարկվեց հանրային իրազեկման խթանման, ֆինանսական կրթության տարածման և դրամագիտական արժեքների հանրահռչակման համատեքստում նախաձեռնության կարևորությունը։ Մեղրի համայնքի ղեկավարը ողջունեց ԿԲ նախաձեռնությունը՝ ընդգծելով, որ այն կարևոր դերակատարություն ունի հանրային իրազեկման, մասնավորապես՝ երիտասարդների ֆինանսական գիտելիքների խորացման առումով։ Նա նշեց, որ համայնքը պատրաստ է ակտիվորեն աջակցել նախաձեռնության կազմակերպմանն ու իրականացմանը՝ միջոցառման արդյունավետությունն առավելագույնի հասցնելու նպատակով։ ՀՀ ԿԲ ներկայացուցիչները, իրենց հերթին, վստահեցրին, որ ծրագրվող միջոցառումը լինելու է հանրամատչելի, կրթական և բազմաբովանդակ՝ միտված հանրությանը ծանոթացնելու ինչպես դրամաշրջանառության պատմությանը, այնպես էլ ԿԲ գործառույթներին, արժույթի թողարկման գործընթացներին և դրա անվտանգության համակարգերին։ Նախատեսվում է ցուցադրել պատմական և ժամանակակից դրամներ, տրամադրել տեղեկատվական նյութեր, ինչպես նաև կազմակերպել ինտերակտիվ և ճանաչողական բաժիններ՝ տարբեր տարիքային խմբերի համար։ |