Տևական ժամանակ աշխատանքների մեկնարկը հետաձգվում էր տեխնիկական կազմակերպման խնդիրների և շինարարի բացակայության պատճառով։
Տեղեկանալով, որ աշխատանքները շարունակ հետաձգվում են և համայնքի բնակիչները կարող են մնալ առանց ոռոգման ջրի՝ հատկապես այգեգործական ակտիվ սեզոնին, համայնքի ղեկավարը անձամբ է նախաձեռնություն ցուցաբերել և իր վրա վերցրել պոմպի տեղադրման կազմակերպման ողջ պատասխանատվությունը։
Նրա միջնորդությամբ շինարար Վանիկ Սարգսյանը համաձայնվել է ստանձնել աշխատանքները, և արդեն չորս օր է, ինչ դրանք ընթանում են ակտիվ տեմպով։
Նոր պոմպը միացվելու է Մեղրու ինքնահոս ջրամատակարարման համակարգին և էապես կբարելավի համայնքի ոռոգման համակարգի արդյունավետությունը։
Նախատեսվում է, որ այն առաջնահերթ կսպասարկի Արաքսաշեն թաղամասը, իսկ անհրաժեշտության դեպքում նաև Ալվանք, Շվանիձոր և Նռնաձոր բնակավայրերի ներքին հողատարածքները։
Արաքսաշեն թաղամասում ոռոգման ջրի խնդիրը նոր չէ։ Տարիներ շարունակ թաղամասի բնակիչները պարբերաբար բախվել են ջրամատակարարման դժվարությունների, ինչը ազդել է գյուղատնտեսական աշխատանքների վրա։Նոր պոմպի տեղադրումը կոչված է ոչ միայն մեղմելու այդ խնդիրը, այլ հիմնովին լուծելու։
Տեղում կատարած շրջայցի ընթացքում համայնքի ղեկավարը հետևել է աշխատանքների ընթացքին, զրուցել աշխատակիցների հետ և վերահաստատել իր պատրաստակամությունը՝ հնարավորինս աջակցելու, որպեսզի պոմպի տեղադրումը անխափան իրականացվի։
Նախաձեռնությունը համայնքային պատասխանատվության և առաջնորդության խոսուն օրինակ է՝ ուղղված բնակիչների կենսամակարդակի բարելավմանը։
Նշենք, որ աշխատանքները նախատեսվում է ավարտին հասցնել մինչև օգոստոսի 25-ը՝ ապահովելով ժամանակին և լիարժեք ջրամատակարարում։