| Բովանդակություն * | Այսօր՝ հուլիսի 22-ին, համայնքի ղեկավար Խաչատուր Անդրեասյանը համայնքապետարանի աշխատակիցների ուղեկցությամբ աշխատանքային այցով եղավ Մեղրի քաղաքի Հիվանդանոցի թաղամասում, որտեղ կայացավ կառուցողական հանդիպում բնակիչների հետ։ Հանդիպման ընթացքում քննարկվեցին թաղամասի կենսապահովման և բարեկեցության մի շարք առաջնահերթ խնդիրներ՝ ենթակառուցվածքների բարելավում, կոմունալ սպասարկում, շրջակա միջավայրի մաքրություն։ Բնակիչները բարձրացրին ջերմության, լուսավորության, տեխնիկայի, կանաչապատման և տարածքների կառավարման հարցեր։ Բնակիչների կողմից բարձրացված խնդիրների լուծման նպատակով համայնքի ղեկավարը տվեց հանձնարարականներ համապատասխան ստորաբաժանումներին՝ իրականացնել հետևյալ աշխատանքները գազապաստարանների մաքրման կազմակերպում, շինարարական աղբի հեռացում շենքերի տանիքներից, արտաքին լուսավորության ապահովում թաղամասի տարածքում, համապատասխան տեխնիկայի տրամադրում (JCB, MAZ), ոռոգման ջրով ապահովում, կանաչապատման և տարածքի բարեկարգման աշխատանքներ, ավտոկայանատեղիի նախագծում և կազմակերպում, աղբամանների և նստարանների տեղադրում, սելավատարերի մաքրման աշխատանքներ։ Համայնքի ղեկավարը նշեց, որ Հիվանդանոցի թաղամասը լինելու է բարեկարգ, ապահով և հարմարավետ բնակավայր, որտեղ կստեղծվեն լիարժեք կենսապայմաններ՝ արդիական ենթակառուցվածքներով, կանաչապատ ու լուսավոր միջավայրով։ Հանդիպումն անցավ կառուցողական մթնոլորտում՝ բնակիչների ակտիվ մասնակցությամբ, իսկ համայնքապետարանը շարունակելու է համատեղ աշխատանքը բնակչության հետ՝ ի նպաստ համայնքի հավասարակշռված զարգացման և առօրյա խնդիրների նպատակային լուծման։ Նման հանդիպումները շարունակական են, ինչը նպատակ ունի ապահովելու թափանցիկություն, բնակիչների իրական մասնակցություն և համատեղ պատասխանատվություն համայնքի զարգացման գործում։ |