| Բովանդակություն * | Հուլիսի 9-ին Մեղրի համայնքի ղեկավար Խաչատուր Անդրեասյանն իր աշխատավայրում հյուրընկալել է «Պարի և սպորտային պարերի համահայկական խորհրդի» նախագահ, «Կաստանետ պարային ստուդիայի» տնօրեն, միջազգային կարգի մրցավար Մարիաննա Մամյանին։ Հանդիպման հիմնական նպատակը Մեղրի համայնքում սպորտային պարահանդեսային պարերի զարգացման հնարավորությունների քննարկումն էր։ Կողմերն ընդգծեցին համագործակցության կարևորությունը՝ համայնքի մշակութային կյանքի հարստացման, երեխաների ու պատանիների ակտիվ ներգրավման, ինչպես նաև մարզամշակութային նախաձեռնությունների խթանման տեսանկյունից։ Քննարկվել են նաև փորձի փոխանակման մեխանիզմները, ինչպես նաև նոր հեռանկարների բացման հնարավորությունները՝ տարածաշրջանային և միջազգային մրցույթների ու միջոցառումների մասնակցության միջոցով։ Հանդիպման ընթացքում նշվել է, որ նախատեսվում է 2026 թվականին Մեղրիում կազմակերպել Սպորտային պարահանդեսային պարերի բաց առաջնություն, ինչը կնպաստի տարածաշրջանի ճանաչելիության բարձրացմանը և համայնքի ակտիվ ներգրավմանը ազգային ու միջազգային մշակութային դաշտում։ Անդրադառնալով արդեն ձեռք բերված հաջողություններին՝ նշվել է, որ Մեղրի համայնքը ներկայացնող պատանի պարուհիները մասնակցել են Ջերմուկում անցկացված համահայկական ձմեռային երկրորդ խաղերին՝ արժանանալով բարձր գնահատականի։ Մարիաննա Մամյանը շնորհակալություն է հայտնել համայնքի ղեկավարին՝ մշակութային զարգացմանը ցուցաբերվող հետևողական աջակցության, վստահության և համագործակցության պատրաստակամության համար։ Համայնքի ղեկավարը շնորհակալագիր է հանձնել Մարիաննա Մամյանին՝ Մեղրի համայնքում սպորտային պարերի դասավանդման գործում ցուցաբերած բարձր նախաձեռնողականության, մասնագիտական հմտության և նվիրված աշխատանքի համար։ |