Մեղրի համայնքում մեկնարկել է «Գործընկերություն հանուն Սյունիքի» ծրագրի հերթական փուլը, որի շրջանակում հուլիսի 21-ին Մեղրիի համայնքապետարանում կայացավ աշխատանքային-տեղեկատվական հանդիպում։ Նախաձեռնության նպատակն է կյանքի դժվարին իրավիճակում հայտնված, այդ թվում՝ հաշմանդամություն ունեցող երեխաների համար ապահովել հասանելի, ինտեգրված սոցիալական, հոգեբանական և կրթական աջակցություն։ Հանդիպման ընթացքում համայնքի ղեկավար Խաչատուր Անդրեասյանը ծրագրի պատասխանատու թիմի անդամների՝ համակարգողի, լոգոպեդի, սոցիալական աշխատողի և հոգեբանի հետ քննարկեց արդեն իրականացված աշխատանքներն ու առաջիկա քայլերը՝ կարևորելով ծրագրի ներդրումը համայնքում երեխաների և ընտանիքների սոցիալ-կրթական խնդիրների լուծման ուղղությամբ։ Ծրագրի իրականացման արդյունքում նախատեսվում է հասնել հետևյալ հիմնական ցուցանիշներին․  40 երեխա կապահովվի շարունակական սոցիալական, հոգեբանական և կրթական աջակցությամբ սոցիալ-ներառական կենտրոնում, երեխաների ինքնավստահությունն ու ինքնուրույնությունը կզարգանան՝ հասնելով մինչև 80% բարելավման,  ծնողների և խնամակալների համար կիրականացվեն ծնողավարման, կենցաղավարման և սոցիալական հմտությունների դասընթացներ,  ծնողների գիտելիքների մակարդակը երեխայի դաստիարակության վերաբերյալ կբարելավվի մինչև 70%, կենտրոնի գործունեությանը կներգրավվեն համայնքի 9 դպրոցներ և մի շարք սոցիալական կառույցներ, ինչն ամբողջապես կխթանի համայնքի համագործակցային ներուժը՝ նպաստելով ինչպես երեխաների բարեկեցությանը, այնպես էլ համայնքի սոցիալական կայունությանը։ Համայնքի ղեկավարը վերահաստատեց իր պատրաստակամությունը՝ շարունակելու սատարել նմանատիպ նախաձեռնություններին՝ ընդգծելով, որ այս ծրագիրը ոչ միայն աջակցում է երեխաներին ու նրանց ընտանիքներին, այլև ձևավորում է սոցիալապես պատասխանատու համայնք։