Հուլիսի 23-ին Մեղրի համայնքի ղեկավար Խաչատուր Անդրեասյանը հերթական աշխատանքային այցով Մեղրի քաղաքի Արաքսաշեն թաղամասում էր, որտեղ հանդիպեց բնակիչների հետ, լսեց նրանց հուզող հարցերն ու առաջարկությունները։
Հանդիպման ընթացքում բնակիչները բարձրաձայնեցին մի շարք կարևոր խնդիրներ, որոնց լուծումը ժամանակի հրամայական է։
Առաջնահերթ շեշտվեց այն հանգամանքը, որ թաղամասում երեխաների համար բացակայում է որևէ զբաղմունքային տարածք. չկա խաղահրապարակ, իսկ գործող լողավազանն արդեն երկար ժամանակ չի շահագործվում։
Այս առիթով համայնքի ղեկավարը վստահեցրեց, որ առաջիկա օրերի ընթացքում իր հանձնարարությամբ լողավազանը կներկվի և անհրաժեշտ աշխատանքներից հետո արդեն կհանձնվի շահագործման։
Բնակիչների բարձրացրած խնդիրների շարքում առանձնացավ նաև շենքի բակի հենապատի կիսաքանդ վիճակը, որը շուտափույթ վերանորոգման կարիք ունի։ Բացի այդ, թաղամասի ճանապարհները նույնպես ենթակա են ասֆալտապատման։
Խաչատուր Անդրեասյանը, լսելով բոլոր խնդիրներն ու առաջարկները, ընդգծեց, որ լիովին պատրաստ է հնարավորինս արագ արձագանքել և աջակցել բոլոր նախաձեռնություններին։
«Մենք այստեղ ենք՝ աշխատելու, լսելու և լուծումներ գտնելու համար։ Ձեր ձայնը պետք է լինի լսելի, իսկ մենք պատրաստ ենք այն դարձնել գործ», — նշեց համայնքի ղեկավարը։
Այցն ավարտվեց փոխադարձ վստահության մթնոլորտում՝ գործողությունների հստակ նշագծմամբ։
Մեղրիի համայնքապետարանը շարունակելու է հետևողական աշխատանքը՝ ուղղված Արաքսաշենի և համայնքի մյուս բնակավայրերի կյանքի որակի բարելավմանը։