Ղեկավարվելով Հայաստանի Հանրապետության Սահմանադրության 6-րդ հոդվաածի 1-ին մասով, «Տեղական ինքնակառավարման մասին» Հայաստանի Հանրապետության օրենքի 35-րդ հոդվածի 1-ին մասի 24-րդ կետով, «Նորմատիվ իրավական ակտերի մասին» Հայաստանի Հանրապետության օրենքի 36-րդ հոդվածի 1-ին մասի 2-րդ կետով և 38-րդ հոդվածով, «Վարչարարության հիմունքների և վարչական վարույթի մասին» Հայաստանի Հանրապետության օրենքի 63-րդ հոդվածի 1-ին մասի ա)կետով, նկատի ունենալով «Սյունիք» ջրօգտագործողների ընկերության 2025 թվականի հունիսի 25-ի թիվ 158/2s գրությունը, պարզեցի`

Համայնքի ղեկավարը Հայաստանի Հանրապետության Սահմանադրությամբ կամ օրենքներով լիազորված չէ պատճառված վնասի գնահատման և տեղում իրավիճակի ուսումնասիրման համար հանձնաժողով ստեղծելու, հետևաբար, համայնքի ղեկավարի իրավական ակտը չի կարող ստեղծել կամ վերապահել լիազորություններ, որոնք օրենքով ամրագրված չեն, այլ«Վարչարարության հիմունքների և վարչական վարույթի մասին» Հայաստանի Հանրապետության օրենքի 45-րդ հոդվածի 1-ին մասին համապատասխան փաստական հանգամանքների ուսումնասիրման համար հարուցված վարչական վարույթի շրջանակներում պետք է նշանակվեր փորձագետ, այսինքն վարչական մարմինն այդ հարցով պետք է դիմեր համապատասխան կազմակերպության ղեկավարին կամ համապատասխան անձին` այդ մասին ծանուցելով վարույթի մասնակիցներին, ավելին` սույն դեպքում վարչական գործի քննություն չի իրականացվել և «Սյունիք» ջրօգտագործողների ընկերությանը չի ծանուցվել վարույթի մասին, որով խախտվել է վերջինիս լսված լինելու իրավունքը, քանի որ քննարկվող հարցերը առնչվում են նշված ընկերությանը:

Մեղրի համայնքի ղեկավարի 2023 թվականի հոկտեմբերի 05-ի թիվ 711-Ա որոշմամբ ստեղծվել է հանձնաժողով, որի լիազորությունների շրջանակում նախատեսվել է նեղ մասնագիտական բնույթի եզրակացության հավասարազոր արձանագրության կազմում: Որպես իրավական հիմք որոշման մեջ նշված է «Տեղական ինքնակառավարման մասին» օրենքը, սակայն այդ օրենքը համայնքի ղեկավարին նման իրավասություն չի տալիս:

Նշված որոշմամբ հանձնաժողովին վերապահվել են այնպիսի գործառույթներ, որոնք ենթադրում են հատուկ մասնագիտական գիտելիքներ, հետևաբար` կարող են իրականացվել բացառապես համապատասխան իրավասություն ունեցող փորձագիտական մարմինների կամ լիցենզավորված մասնագետների կողմից: Տեղական ինքնակառավարման մարմինների իրավասությունները և գործառույթները կարգավորվում են օրենքով, և դրանցից դուրս գործողությունները անթույլատրելի են: Համայնքի ղեկավարի որոշման արդյունքում ստացված արձանագրությունը իրավաբանորեն չի կարղ համարվել իրավաչափ փաստաթուղթ, քանի որ այն կազմվել է իրավազորությունից դուրս գործող հանձնաժողովի կազմից: Բացի այդ, նման բնույթի գնահատականներն ու եզրակացությունները կարող են տրվել միայն վարչական ընթացակարգով սահմանված կարգով, այն դեպքում, երբ փաստական հանգամանքները պարզելուհամար պահանջվում են հատուկ գիտելիքներ: Ավելին, նման իրավական ակտը հակասում է ՀՀ Սահմանադրության և «Նորմատիվ իրավական ակտերի մասին» օրենքի պահանջներին, ըստ որոնց` որևէ իրավական ակտ չի կարող հակասել վերադաս օրենքին, ինչպես նաև չի կարող իրավազորություն վերապահել այդ դեպքերում,երբ նման լիազորություն օրենքով ամրագրված չէ:

Այսպիսով, վերոնշյալ հիմքերով արձանագրվում է, որ Մեղրի համայնքի ղեկավարի 2023 թվականի հոկտեմբերի 05-ի թիվ 711-Ա որոշմամբ թույլ է տրվել իրավասության սահմանազանցում, որի արդյունքում ձևավորվել է իրավազուրկ հանձնաժողով, և հետևաբար` այդ որոշումը ենթակա է անվավեր ճանաչման, ինչից ելնելով` ՈՐՈՇՈՒՄ ԵՄ

1. Անվավեր ճանաչել Հայաստանի Հանրապետության Սյունիքի մարզի Մեղրի համայնքի ղեկավարի 2023 թվականի հոկտեմբերի 05-ի «Պատճառված վնասի գնահատման և տեղում իրավիճակի ուսումնասիրման համար հանձնաժողով ստեղծելու մասին» թիվ 711-Ա որոշումը:

2. Սույն որոշումն ուժի մեջ է մտնում ստորագրման պահից: