Մեղրի համայնքի հարգելի բնակիչներ, Տեղեկացնում ենք, որ Հայաստանի Հանրապետությունում մեկնարկել են գյուղատնտեսության զարգացման մի շարք կարևոր ծրագրեր, որոնց նպատակն է աջակցել տնտեսվարողներին և բարձրացնել գյուղատնտեսական արտադրության արդյունավետությունը: 1. Տավարաբուծության զարգացման ծրագիր (2025-2029 թթ.) Ծրագրի շրջանակում տնտեսավարողներին մատչելի պայմաններով կտրամադրվեն տոհմային ԽԵԿ-եր՝ ըստ մթերատվության ուղղության (կաթնային, մսային և համակցված ցեղեր)։ Նախապայման է միայն կենդանիների սեռահասակային խմբի համապատասխանությունը՝ երինջներ (հղիությունը ճշտված) և 14-17 ամսական էգ մատղաշ։ 2. Բուսաբուծության աջակցության ծրագիր (2025 թ.) ՀՀ կառավարության 2025 թվականի մարտի 27-ի N 356-Լ որոշմամբ մեկնարկել է բուսաբուծության աջակցության ծրագիրը։ Ծրագրով նախատեսվում է 2025 թվականին փոխհատուցել հացահատիկային, հատիկաընդեղեն և կերային մշակաբույսերի մեկ հեկտարի հաշվով կատարվող հիմնական աշխատանքների (վարի, ցանք, բերքահավաք) և սերմի արժեքի համար նախատեսված ծախսերի մինչև 50%-ը։ Ցանքերը պետք է իրականացվեն միայն լաբորատոր փորձաքննություն անցած և հավաստագրված սերմերով: 3. «Խելացի» անասնաշենքերի կառուցման կամ վերակառուցման և տեխնոլոգիական ապահովման աջակցություն Մեկնարկում է «Խելացի» անասնաշենքերի կառուցման կամ վերակառուցման ծրագիրը, որի նպատակն է բարելավել կենդանիների պահվածքի պայմանները և բարձրացնել մթերատվության ցուցանիշները։ Ծրագրով խրախուսվում է անկապ բոքսային պահվածքով անասնաշենքերի կառուցումը կամ վերակառուցումը՝ տեխնոլոգիական համալրմամբ։ Անասնաշենքերում պետք է պարտադիր պահվեն տոհմային կենդանիներ։ Շահառուներ կարող են լինել իրավաբանական անձինք, համայնքները (եթե ծրագիրն իրականացվում է առանց սուբվենցիոն մեխանիզմի) և անհատ ձեռնարկատերերը։ Կապալառուները պետք է լիցենզավորված լինեն ՀՀ քաղաքաշինության կոմիտեի կողմից և ապահովեն երաշխիքային և հետերաշխիքային սպասարկում։ Վերջիններիս մանրամասներին կարելի է ծանոթանալ հետևյալ հղումներով https://www.e-gov.am/gov-decrees/item/44371/, https://mineconomy.am/page/3288, ինչպես նաև կից սեղմագրերով։